ମାଞ୍ଚେଷ୍ଟର, ୟୁନାଇଟେଡ୍‍ କିଙ୍ଗ୍‍ଡମ୍‍ (ୟୁକେ)ର ଦ୍ୱିତୀୟ ବୃହତ୍ତମ ନଗରୀ ମାଞ୍ଚେଷ୍ଟରଠାରେ ବିଶ୍ୱବ୍ରହ୍ମାଣ୍ଡର ସର୍ବବୃହତ୍ତ ଦେବତା
ଶ୍ରୀଜଗନ୍ନାଥଙ୍କର ବିଗ୍ରହ ପ୍ରତିଷ୍ଠା ଉତ୍ସବ ଶନିବାର ମହାସମାରୋହରେ ପାଳିତ ହୋଇଯାଇଛି । ସକାଳୁ ପୂଜାର୍ଚ୍ଚନା, ଅଧିବାଶ, କଳସ ଯାତ୍ରା, ଅଭିଷେକ,
ମୂର୍ତ୍ତି ସ୍ଥାପନା ଓ ପ୍ରାଣ ପ୍ରତିଷ୍ଠା ଆଦି ଧାର୍ମିକ ନୀତି, ବିଧି ମୁତାବକ ଅତ୍ୟନ୍ତ ଭକ୍ତିପୂତ ପରିବେଶ ମଧ୍ୟରେ ସମାପନ କରାଯାଇଥିଲା । ଏହି ଉପଲକ୍ଷେ
ଚତୁର୍ଦ୍ଧା ମୂର୍ତ୍ତି ବିରାଜମାନ କରୁଥିବା ୨୩୧ନମ୍ବର ଉଇଦିଂଟନ୍‍ ରୋଡ୍‍ସ୍ଥିତ ଗୀତ ହିନ୍ଦୁ ମନ୍ଦିରକୁ ରଙ୍ଗବେରଙ୍ଗର କାଗଜ ଓ କପଡ଼ାରେ ଭବ୍ୟ
ଢଙ୍ଗରେ ସଜା ଯାଇଥିବା ଦେଖାଯାଇଥିଲା । ଅପରାହ୍ଣ ୧୨.୪୫ମିନିଟ୍‍ରୁ ୧.୪୫ମିନିଟ୍‍ ମଧ୍ୟରେ ଦିଅଁମାନଙ୍କ ସାମ୍ନାରେ ନାମଯଜ୍ଞ, ହୋମ, ଭୋଗ,
ମହା ଆଳତି ଓ ପୁଷ୍ପାଞ୍ଜଳି ଆଦି ଧାର୍ମିକ କାର୍ଯ୍ୟକ୍ରମ ‘ଗ୍ଲାସ୍‍ ଗୋ’ ହିନ୍ଦୁ ମନ୍ଦିରର ମୁଖ୍ୟ ପୂଜାରୀ ଆଚାର୍ଯ୍ୟ ମେଦିନୀ ପତି ମିଶ୍ର ଏବଂ ଗୀତା ଭବନର
ମୁଖ୍ୟ ପୂଜାରୀ ଆଚାର୍ଯ୍ୟ ଶ୍ୟାମସୁନ୍ଦର ଶର୍ମାଙ୍କର ସଂଯୁକ୍ତ ତତ୍ତ୍ୱାବଧାନରେ ସମ୍ପନ୍ନ କରାଯାଇଥିଲା । ବହୁ ପ୍ରତୀକ୍ଷିତ ଏହି ପ୍ରତିମା ସ୍ଥାପନା ଉତ୍ସବକୁ
ଦେଖିବା ପାଇଁ ମନ୍ଦିର ପରିସରରେ ପାଖାପାଖି ୫୦୦ ଓଡ଼ିଆ ଓ ଅଣଓଡ଼ିଆ ଶ୍ରଦ୍ଧାଳୁମାନେ ସେମାନଙ୍କ ପରିବାର ସହିତ ସମ୍ମିଳିତ ହୋଇଥିବା ଲକ୍ଷ୍ୟ
କରାଯାଇଥିଲା । ଅପରାହ୍ଣ ୨.୩୦ମିନିଟ୍‍ ସମୟରେ ଚତୁର୍ଦ୍ଧା ମୂର୍ତ୍ତିଙ୍କୁ ରୋଷଣି ସହିତ ଗୀତା ଭବନ ପରିସରରେ ଥିବା ସୁନ୍ଦର, ସୁସଜ୍ଜିତ ରଥ ଉପରକୁ
ନିଆଯାଇଥିଲା । ରଥ ନିର୍ମାଣ ଓ ଏହାର ସାଜସଜ୍ଜା କରିବାରେ ଜୀବନ ପାଣିଗ୍ରାହୀ, ବିଷ୍ଣୁ ଦାଶ ଓ ପ୍ରଶାନ୍ତ ସାହୁ ପ୍ରମୁଖ ମୁଖ୍ୟ ଭୂମିକା ଗ୍ରହଣ କରିଥିଲେ ।

ଉପସ୍ଥିତ ଭକ୍ତମାନଙ୍କର ହରିବୋଲ, ହୁଳହୁଳି, ଜୟ ଜଗନ୍ନାଥ ଧ୍ୱନୀ ଏବଂ ଶଙ୍ଖ, ଘଣ୍ଟ, କର୍ତ୍ତାଳ, ମର୍ଦଳ, ଝାଞ୍ଜ ଓ ମୃଦଙ୍ଗର ଘୋର ଘର୍ଗର ନାଦ,
ଗଗନ ପବନକୁ ପ୍ରକମ୍ପିତ କରିବାର ଦୃଶ୍ୟ ବେଶ୍‍ ହୃଦୟସ୍ପର୍ଶୀ ଥିଲା । ଡକ୍ଟର ଶିବ ସେନାପତି ପାରମ୍ପରିକ ଛେରା ପହଁରା କାର୍ଯ୍ୟ ତୁଲାଇଥିଲେ । ଏହା
ପରେ ଭଜନ, କୀର୍ତ୍ତନର ସୁମଧୂର ମୁର୍ଚ୍ଛନା ମଧ୍ୟରେ ରଥଟିକୁ ଉଇଦିଂଟନ୍‍, ଉଇଲ୍‍ବ୍ରାହାମ୍‍, ବାଣ୍ଟିଂହମ୍‍ ଏବଂ ଆଲେକ୍‍ଜାଣ୍ଡ୍ରା ସାଉଥ୍‍ ଆଦି ରାସ୍ତାରେ
ଦୁଇ ମାଇଲ୍‍ ପରିମିତ ଆଲେକ୍‍ଜାଣ୍ଡ୍ରା ପାର୍କ ପର୍ଯ୍ୟନ୍ତ ଟଣାଯାଇ ପୁଣି ମନ୍ଦିର ବେଢ଼ାକୁ ଫେରାଇ ଅଣାଯାଇଥିଲା । ରଥ ଉପରେ ଶୋଭା ପାଉଥିବା
ଜଗତର ନାଥ ଶ୍ରୀଜଗନ୍ନାଥ, ବଡ଼ ଭାଇ ଶ୍ରୀବଳଭଦ୍ର, ଭଉଣୀ ଦେବୀ ଶୁଭଦ୍ରା ଏବଂ ଶ୍ରୀସୁଦର୍ଶନଙ୍କର ଅପୂର୍ବ ଓ ଅଲୌକିକ ଝଲକ ଖୁବ୍‍ ଅନନ୍ୟ ଓ
ଅପାଶୋରା ଥିଲା । ଭାରତୀୟ ଓ ବିଦେଶୀ ଭକ୍ତମାନେ ରଥାରୁଢ଼ ଠାକୁରମାନଙ୍କର ଦିବ୍ୟ ଦର୍ଶନ ଲାଭର ପୂଣ୍ୟ ଅର୍ଜନ କରି କୃତକୃତ୍ୟ ହେଉଥିବା
ପରିଲ୍ଲକ୍ଷିତ କରାଯାଇଥିଲା ।
ନିକଟରେ ନିମ କାଠରେ ପୁରୀଠାରେ ନିର୍ମିତ କରାଯାଇଥିବା ଦିଅଁମାନଙ୍କର ପ୍ରତିମୂର୍ତ୍ତିଗୁଡ଼ିକୁ କୋରିଅର୍‍ ଯୋଗେ ମାଞ୍ଚେଷ୍ଟରକୁ ଅଣାଯାଇଥିଲା । ଗୀତା
ଭବନରେ ପ୍ରତିମା ପ୍ରତିଷ୍ଠା ସକାଶେ ଏହାର ସଂସ୍ଥାପକ ଓ ପରିଚାଳକ ସଂସ୍ଥା ହିନ୍ଦୁ ସାଂସ୍କୃତିକ ସମାଜର ବରିଷ୍ଠ ଟ୍ରଷ୍ଟି ରାଜକୁମାର କୌଶଳ ବିଶେଷ
ଭାବେ ସାହାଯ୍ୟ ସହଯୋଗ କରିଥିବା ଜଣାଯାଇଛି । ସନ୍ଧ୍ୟାରେ ଠାକୁରମାନଙ୍କୁ ସ୍ଥାନୀୟ ଇସ୍କନ ଟିମ୍‍ ଦ୍ୱାରା ପ୍ରସ୍ତୁତ ପ୍ରସାଦ ଅର୍ପଣ କରାଯାଇଥିଲା ।
ଉପସ୍ଥିତ ଭକ୍ତମାନେ ମଧ୍ୟ ପୁରୀ ଆନନ୍ଦ ବଜାରର ଅବଢ଼ା ଶୈଳୀରେ ପ୍ରସ୍ତୁତ ଏହି ସ୍ୱାଦିଷ୍ଟ ପ୍ରସାଦ ସେବନର ସୁଯୋଗ ଲାଭ କରିଥିଲେ ।
ମାଞ୍ଚେଷ୍ଟରଠାରେ ଚତୁର୍ଦ୍ଧା ମୂର୍ତ୍ତିଙ୍କର ସ୍ଥାପନା ହେବାଦ୍ୱାରା ଉତ୍ତର-ପଶ୍ଚିମ ଇଂଲଣ୍ଡ ଇଲାକାରେ ବସବାସ କରୁଥିବା ଓଡ଼ିଆ ଅଧିବାସୀମାନଙ୍କର ଦୀର୍ଘ
ଦିନର ସ୍ୱପ୍ନ ସାକାର ହେଲା ବୋଲି ଉତ୍ସବର ପ୍ରଧାନ ଆୟୋଜକ ଓ ପ୍ରସିଦ୍ଧ ଜଗନ୍ନାଥ ଭକ୍ତ ଡକ୍ଟର ଶିବ ସେନାପତି ଓ ଶ୍ରୀମତୀ ରେଖା ସେନାପତି
ମତପ୍ରକାଶ କରିଛନ୍ତି ।
ବିଗ୍ରହ ସ୍ଥାପନା ସମାରୋହ ଏବଂ ରଥଯାତ୍ରା ଆୟୋଜନରେ ପ୍ରମୁଖ ଭୂମିକା ଗ୍ରହଣ କରିଥିବା ଅନ୍ୟ ସଂଗଠକମାନଙ୍କ ମଧ୍ୟରେ ଜୀବନ ପାଣିଗ୍ରାହୀ,
ଦୁର୍ଗେଶ ନନ୍ଦିନୀ ମିଶ୍ର, ପ୍ରଶାନ୍ତ ସାହୁ, ରୋଜାଲିନ ବିଶ୍ୱାଳ, ବିଷ୍ଣୁ ଦାଶ, ସୁଶ୍ରୀ ମିଶ୍ର, ଶିବ ରଞ୍ଜନ ବିଶ୍ୱାଳ ଓ ପୂଜା ଖଣ୍ଡୁଆଳ ପ୍ରମୁଖ ଅନ୍ତର୍ଭୁକ୍ତ ଥିଲେ ।
ସୁନାମଧନ୍ୟ କାଳାକାଳମାନଙ୍କ ଦ୍ୱାରା ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ମଧ୍ୟ ସମାରୋହର ଅଂଶବିଶେଷ ଥିଲା । ଉପସ୍ଥିତ ଦର୍ଶକମାନଙ୍କୁ
ମନ୍ତ୍ରମୁଗ୍ଧ କରିଥିବା ପ୍ରସ୍ତୁତିଗୁଡ଼ିକ ମଧ୍ୟରେ ନିରୁଶ୍ରୀ ନିର୍ଲିପ୍ତା ମହାନ୍ତି ଓ ଦ୍ରିସିକା ପାଣିଗ୍ରାହୀଙ୍କଦ୍ୱାରା ଭଜନ ଓ ଜଣାଣ ଗାୟନ, ନ୍ରିତ୍ୟ ରାମମୋହନଙ୍କ
ଦ୍ୱାରା ଭାରତନାଟ୍ଟ୍ୟମ ଏବଂ ଏଲିନା ଏଭେଲିନ୍‍ ଓ ଗ୍ରାସି ଆରୋରାଙ୍କ ଦ୍ୱାରା ଓଡ଼ିଶୀ ନୃତ୍ୟ ସଂରଚନା ଅନ୍ତର୍ଭୁକ୍ତ ଥିଲା । ଉପସ୍ଥିତ ମାନ୍ୟଗଣ୍ୟ ବ୍ୟକ୍ତିମାନଙ୍କ ମଧ୍ୟରେ ଡକ୍ଟର ନିଶେବିତା ଦାସ, ଡକ୍ଟର ରମେଶ ରାଉତରାୟ, ଡକ୍ଟର ରୀନା ରାଉତରାୟ, ଡକ୍ଟର ନୀରେନ୍ଦ୍ର
ଜେନା, ଶ୍ରୀମତୀ ବିଦ୍ୟୁତ୍‍ ଜେନା, ଡକ୍ଟର ବିଭୁ ପ୍ରସାଦ ଦାଶ, ଡକ୍ଟର ସଙ୍ଗୀତା ଦାଶ, ଶ୍ରୀମତୀ ମମତା ନାୟକ, ଡକ୍ଟର ଜୀନିତା ମହାନ୍ତି, ଡକ୍ଟର ପ୍ରକାଶ
ଦେ ଏବଂ ଡକ୍ଟର ଦେବକାନ୍ତ ବେହେରା ପ୍ରମୁଖ ସାମିଲ ଥିଲେ ।