ବାଲିଗୁଡା,(ଉଲାପ୍ର): କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ ଜି. ଉଦୟଗିରି ବନପାଳ ପ୍ରଶିକ୍ଷଣ ତାଲିମ କେନ୍ଦ୍ରର ୪୯ତମ ବନପାଳ ତାଲିମ ପ୍ରଶିକ୍ଷଣରେ ମୁଖ୍ୟ ବନ ସଂରକ୍ଷକ ତାଲିମ ଓ ଉନ୍ନୟନ ବିଭାଗ ଆଇଏଫଏସ ଅକ୍ଷୟ କୁମାର ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗଦେଇ ବନପାଳମାନେ ନେଇଥିବା ତାଲିମର ସୁବିନିଯୋଗ କରି ପାରିଲେ ବିଭାଗର ମର୍ଯ୍ୟାଦା ବଢିବ ବୋଲି ମତବ୍ୟକ୍ତ କରିଥିଲେ। ଏହାସହ ବନରକ୍ଷୀମାନେ ୫୦ ଓ ବନପାଳମାନେ ୧୦୦ ଗଛ ଅନ୍ତତଃ ଚିହ୍ନିବାର ଆବଶ୍ୟକତା ଅଛି ବୋଲି ସେ କହିଥିଲେ।ଉପ-ବନ ସଂରକ୍ଷକ ପୂର୍ଣ୍ଣଚନ୍ଦ୍ର ଗୁରୁଙ୍କ ଅଧ୍ୟକ୍ଷତାରେ ଆୟୋଜିତ ୪୯ତମ ସମାବର୍ତ୍ତନ ଉତ୍ସବରେ ଅନ୍ୟତମ ଅତିଥି ଭାବେ ଅବସରପ୍ରାପ୍ତ ମୁଖ୍ୟ ବନ ସଂରକ୍ଷକ ଲକ୍ଷ୍ମୀଧର ଦାସ ଯୋଗଦେଇ ବନ ବିଭାଗରେ ବନପାଳଙ୍କ ଭୂମିକା ସମ୍ପର୍କରେ ଆଲୋକପାତ କରିଥିଲେ। ଆୟୋଜିତ ବିଭିନ୍ନ ପ୍ରତିଯୋଗିତା ଓ ସାଂସ୍କୃତିକ କାର୍ୟ୍ୟକ୍ରମରେ କୃତି ପ୍ରତିଯୋଗୀମାନଙ୍କୁ ମେଡାଲ ସହ ମାନପତ୍ର ପ୍ରଦାନ କରାଯାଇଥିଲା। କାର୍ଯ୍ୟକ୍ରମରେ ବେଷ୍ଟ ଅଫ୍ ଅଲ ରାଉଣ୍ଡର ଭାବେ ବନପାଳ ରଞ୍ଜିତା ପଣ୍ଡାଙ୍କୁ ମେଡାଲ ସହ ମାନପତ୍ର ପ୍ରଦାନ କରାଯାଇଛି। କାର୍ଯ୍ୟକ୍ରମରେ ଅବସରପ୍ରାପ୍ତ ଉପ-ବନ ସଂରକ୍ଷକ କମଳାକାନ୍ତ ତ୍ରୀପାଠୀ ଧନ୍ୟବାଦ ଅର୍ପଣ କରିଥିବା ବେଳେ କାର୍ୟ୍ୟକ୍ରମ ପରିଚାଳନାରେ ଡେପ୍ୟୁଟି ରେଞ୍ଜର ନୀଳମାଧବ ସାହୁ, ବନପାଳ ଶଙ୍କର ପଣ୍ଡା, ବନରକ୍ଷୀ ପ୍ରଭାତ ପଣ୍ଡା ପ୍ରମୁଖ ସହଯୋଗ କରିଥିଲେ।