ନୂଆଦିଲ୍ଲୀ : ଦେଶରେ ହୁ ହୁ ହୋଇ ବଢୁଥିବା କରୋନା ସଂକ୍ରମିତଙ୍କ ସଂଖ୍ୟାକୁ ନେଇ ରାଜନୀତି ତୀବ୍ର ହେବାରେ ଲାଗିଛି । ଦେଶରେ ବଢୁଥିବା କରୋନା ସଂକ୍ରମଣକୁ ରୋକିବାରେ ସରକାର ବିଫଳ ହୋଇଥିବା ବିରୋଧୀ ଦଳମାନେ ଅଭିଯୋଗ କରିଛନ୍ତି । ଦେଶର ଅର୍ଥନୀତିକୁ ତ୍ବରାନ୍ବିତ କରିବା ପାଇଁ ଅନଲକ୍-୧ ଆରମ୍ଭ ହେବାପରେ ଦେଶରେ କରୋନା ମାମଲା ହୁ ହୁ ହୋଇ ବୃଦ୍ଧି ପାଉଛି। ଯାହା ସରକାରଙ୍କୁ ମଧ୍ୟ ଚିନ୍ତାରେ ପକାଇଛି ।ଏଥିସହିତ ପୂର୍ବତନ କଂଗ୍ରେସ ସଭାପତି ତଥା ୱାଇନାଡ ସାଂସଦ ରାହୁଲ ଗାନ୍ଧୀ କରୋନା ସଙ୍କଟ ସମୟରେ ମୋଦୀ ସରକାରଙ୍କୁ ଟାର୍ଗେଟ କରିଛନ୍ତି । ରାହୁଲ ତାଙ୍କ ଟ୍ବିଟରରେ କରୋନା ଗ୍ରାଫ ସେୟାର କରିବା ସହ ଲେଖିଛନ୍ତି ଯେ ଭାରତ କରୋନା ମହାମାରୀ ମୁକାବିଲା କରିବା ପାଇଁ ଏକ ଭୁଲ ବାଟରେ ଯାଉଛି । ସରାକରଙ୍କ ଅହଂକାର ଏବଂ ଅକ୍ଷମତା  ଯୋଗୁଁ ଦେଶରେ ବର୍ତ୍ତମାନ କରୋନା ସଂକ୍ରମଣ ବଢିବାରେ ଲାଗିଛି । ଏହି ଟୁଇଟରେ ରାହୁଲ ଗାନ୍ଧୀ ଏକ ୨୦ ସେକେଣ୍ଡ ଭିଡିଓ ମଧ୍ୟ ସେୟାର କରିଛନ୍ତି।

ସୂଚନାଯୋଗ୍ୟ ଗୁରୁବାର ଦିନ ଭାରତ ବ୍ରିଟେନକୁ ଅତିକ୍ରମ କରି କରୋନା ଜୀବାଣୁ ଦ୍ୱାରା ପ୍ରଭାବିତ ଦେଶ ତାଲିକାରେ ଚତୁର୍ଥ ସ୍ଥାନରେ ପହଞ୍ଚିଛି। ଏହି ଭିଡିଓରେ ଦର୍ଶାଯାଇଛି ଯେ ଦିନକୁ ଦିନ ଭାରତରେ କିପରି କରୋନା ସଂକ୍ରମଣ ସଂଖ୍ୟା ବୃଦ୍ଧି ପାଉଛି ଏବଂ ବର୍ତ୍ତମାନ ଭାରତ କୋଭିଡ -୧୯ ଦ୍ୱାରା ଅଧିକ ପ୍ରଭାବିତ ଦେଶ ତାଲିକାରେ ଚତୁର୍ଥ ସ୍ଥାନରେ ରହିଛି।
କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଆଜି ଦେଶରେ କୋଭିଡ -୧୯ ର ୧୧ ହଜାର ୪୫୮ ଟି ନୂଆ ମାମଲା ରୁଜୁ ହୋଇଛି ଏବଂ ଗତ ୨୪ ଘଣ୍ଟା ମଧ୍ୟରେ ୩୮୬ ଜଣଙ୍କର ମୃତ୍ୟୁ ହୋଇଛି। ଏଥିସହିତ ସମଗ୍ର ଦେଶରେ ମୋଟ୍ କରୋନା ପଜିଟିଭ ମାମଲା ୩ ଲକ୍ଷ ୮ହଜାର ୯୯୩ରେ ପହଞ୍ଚିଛି , ସେଥିମଧ୍ୟରୁ ୧ଲକ୍ଷ ୪୫ ହଜାର ୭୭୯ ଟି ସକ୍ରିୟ ମାମଲା, ୧ଲକ୍ଷ ୫୪ ହଜାର ୩୩୦ ଜଣ ଲୋକ ସୁସ୍ଥ ହୋଇ ଡାକ୍ତରଖାନାରୁ ଡିସଚାର୍ଜ ହୋଇଛନ୍ତି ଏବଂ ଏପର୍ଯ୍ୟନ୍ତ ୮ ହଜାର ୮୮୪  ଜଣଙ୍କର ମୃତ୍ୟୁ ହୋଇଛି।